दोन्ही शिवसेना एकत्र येण्याच्या हालचालींना वेग:धाराशिव जिल्हयात आ.तानाजी सावंतांचा भाजपला एकटं पाडण्याचा प्रयत्न
धाराशिव रिपोर्टर
धाराशिव जिल्हा परिषद निवडणुकीच्या पार्श्वभूमीवर जिल्ह्यातील राजकीय घडामोडींना वेग आला असून, दोन्ही शिवसेना एकत्र येण्याच्या हालचाली जोर धरू लागल्या आहेत. ठाकरे शिवसेनेचे खासदार ओमराजे निंबाळकर आणि आमदार कैलास पाटील यांनी पुण्यात शिंदे शिवसेनेचे आमदार तानाजी सावंत यांची भेट घेतल्याची सुत्रांची माहिती आहे.या भेटीमुळे जिल्हा परिषद निवडणुकीत राजकीय समीकरणे बदलण्याची शक्यता वर्तवली जात आहे.
या भेटीनंतर उद्या दोन्ही शिवसेनेच्या नेत्यांची व पदाधिकाऱ्यांची संयुक्त बैठक आयोजित करण्यात येणार असल्याचीही खात्रीलायक माहिती आहे.या बैठकीत जिल्हा परिषद निवडणुकीसाठीची रणनीती, जागावाटप आणि संभाव्य आघाडीबाबत चर्चा होण्याची शक्यता आहे.
दरम्यान,याच पार्श्वभूमीवर आज शिवसेना उद्धव बाळासाहेब ठाकरे पक्षाच्या वतीने धाराशिव येथे पदाधिकाऱ्यांची महत्त्वपूर्ण बैठक बोलावण्यात आली आहे.या बैठकीत स्थानिक पातळीवरील राजकीय परिस्थितीचा आढावा घेऊन पुढील दिशा ठरवली जाणार असल्याची माहिती सूत्रांकडून मिळत आहे.एकंदरीतच जिल्हा परिषद निवडणुकीत भाजपाला एकटे पाडण्यासाठी आमदार तानाजी सावंत, खासदार ओमराजे निंबाळकर आणि आमदार कैलास पाटील यांनी समन्वयाची भूमिका घेतल्याचं चित्र सध्या दिसत आहे. त्यामुळे धाराशिव जिल्ह्यातील राजकारणात येत्या काही दिवसांत मोठे बदल पाहायला मिळण्याची शक्यता आहे.धाराशिव तालुक्यातील ढोकी येथे काही दिवसापुर्वी पार पढलेल्या शिवसेनेच्या मेळाव्यात शिवसेनेचे आमदार तानाजी सावंत यांनी सर्व पक्षांना एकत्र येण्याचे आवाहन केले होते त्या प्रमाणे जिल्हयात राजकीय वातावरण बदलताना दिसत आहे.
