लोहाऱ्यात शिवसेनेचे शक्तिप्रदर्शन
आनंद पाटील यांच्या मातोश्री सुवर्णा सतीश पाटील जिल्हा परिषद निवडणुकीच्या मैदानात
धाराशिव रिपोर्टर
जिल्हा परिषद निवडणुकीच्या पार्श्वभूमीवर लोहारा तालुक्यात शिवसेनेने आपली ताकद दाखवून दिली आहे. शिवसेनेचे लोकसभा अध्यक्ष आनंद पाटील यांच्या मातोश्री सौ. सुवर्णा सतीश पाटील यांनी जिल्हा परिषद निवडणुकीसाठी अधिकृतपणे मैदानात उतरत उमेदवारी अर्ज दाखल केला.
या अर्ज दाखल कार्यक्रमावेळी शिवसेनेचे संपर्कप्रमुख राजन साळवी यांच्या उपस्थितीत जोरदार शक्तिप्रदर्शन करण्यात आले. शिवसेनेचे पदाधिकारी, कार्यकर्ते आणि समर्थक मोठ्या संख्येने उपस्थित होते. त्यामुळे लोहाऱ्याच्या राजकारणात शिवसेनेने आपली मजबूत उपस्थिती अधोरेखित केली आहे.
यावेळी बोलताना आनंद पाटील यांनी सांगितले की,
ही निवडणूक शिवसेनेचे संपर्कप्रमुख राजन साळवी, माजी आमदार ज्ञानराज चौगुले आणि पालकमंत्री प्रताप सरनाईक यांच्या मार्गदर्शनाखाली लढवली जात आहे. पक्षश्रेष्ठींनी माझ्या विनंतीला मान देत माझ्या मातोश्रींना उमेदवारी दिली, याबद्दल त्यांनी शिवसेना नेतृत्वाचे आभार मानले.
कानेगाव जिल्हा परिषद गटातून निवडणूक लढवणाऱ्या सौ. सुवर्णा पाटील यांच्या माध्यमातून परिसराच्या सर्वांगीण विकासासाठी कटिबद्ध असल्याचे आश्वासन आनंद पाटील यांनी दिले.
“कानेगाव गटाचा कायापालट करून दाखवू, नागरिकांच्या मूलभूत प्रश्नांना प्राधान्य देऊ,” असेही ते म्हणाले.
या उमेदवारीमुळे कानेगाव गटातील राजकीय समीकरणे बदलण्याची शक्यता वर्तवली जात असून, आगामी जिल्हा परिषद निवडणूक लढतीत शिवसेनेला मोठे बळ मिळाल्याचे मानले जात आहे.
एकूणच, लोहाऱ्यातील या शक्तिप्रदर्शनामुळे शिवसेनेची तयारी आणि आत्मविश्वास स्पष्टपणे दिसून आला असून, जिल्हा परिषद निवडणूक अधिकच रंगतदार होण्याची चिन्हे आहेत.
